Алматы әкімі Бауыржан Байбек Америка Құрама Штаттарының Қазақстан Республикасындағы елшісі Уильям Мозермен кездесті. Кездесуде тараптар сауда-экономикалық және мәдени-гуманитарлық байланыстарды нығайту мәселелерін талқылады. Бұл туралы қалалық әкімдіктің баспасөз қызметі хабарлады.
АҚШ − Қазақстанның негізгі экономикалық серіктестерінің бірі. Алматыда американдық капиталдың қатысуымен телекоммуникациялық, қаржылық, сауда және басқа да салаларда 172 кәсіпорын жұмыс істейді. 2018 жылдың 11 айында Алматы мен АҚШ арасындағы тауар айналымы, 2017 жылмен салыстырғанда, 470 миллионнан астам $ құрап, 11%-ға өсті.
Елші Алматыда 1996-99 жылдары отбасымен бірге өмір сүргенін, содан бері қала өзгергенін атап өтті. Елшіге жаяу жүретін жаңа Панфилов көшесі жақсы әсер қалдырды.
Мозер Орталық Азиядағы Құрама Штаттардың жалғыз Бас консулдығы Алматыда орналасқанын, қаланың АҚШ үшін стратегиялық маңызы бар екенін еске салды. Алматыда Бас консулдықтың жаңа ғимаратын салу жоспарланып отыр, бұл ұзақ мерзімді әріптестік қатынастарды дамытудың негізі және республикада жұмысқа қызығушылық танытатын инвесторлар мен американдық кәсіпорындар үшін бастама болып табылады.
Сурет: Алматы әкімі
