Алматы әкімі Бақытжан Сағынтаев бүгін брифинг өткізіп, онда алдағы уақытта оңтүстік астанада коронавирус инфекциясына тест жүргізетін жаңа вирусологиялық зертханалар ашылатынын айтты. Бұл туралы vlast.kz ақпарат агенттігі жазады.
Сағынтаев бұдан 10 күн бұрын Алматыда коронавирусты тестілеуде белгілі бір жаңылыс болғанын, атап айтқанда жеке зертханалардың реагенттері аяқталғанын және Ұлттық сараптама орталығының филиалында қызметкерлер ауырғанын еске салды.
Алматы әкімі мәлімдегендей, қазір оңтүстік астанадағы вирусологиялық зертханалардың барлығы толық жұмыс істеп тұр.
“Ертең жедел жәрдем ауруханасы аумағындағы тағы бір жеке зертхана іске қосылады. Жақын арада біздің жеке клиникаларымыздың базасында тағы бір жеке зертхананың ашылуын күтудеміз”, – деп уәде берді Бақытжан Сағынтаев.
Бүгінгі таңда Алматыда коронавирус жұқтырудың 6201 жағдайы ресми тіркелді, ал Қазақстан Республикасында олардың жалпы саны 48574-ке жетті.
Сурет: gluvexlab.com
