Алматы әкімі Бақытжан Сағынтаев Орталық коммуникациялар қызметінде брифинг өткізіп, оңтүстік астанада коронавирустық инфекцияға қарсы жаппай вакцинациялауға дайындық басталғанын мәлімдеді.
Оның айтуынша, бүгін Алматыда вакцинацияны жүргізетін медицина қызметкерлерін даярлау жүзеге асырылуда. Сонымен қатар, коронавирусқа қарсы вакцинаны сақтауға арналған қосымша жабдық сатып алу мәселесі пысықталуда.
Алматы әкімі бірінші кезекте қауіп-қатер тобындағы адамдар: медицина қызметкерлері, әскери қызметшілер және құқық қорғау органдары вакциналанатынын айтты.
Ресми мәліметтер бойынша, індет басталғаннан бүгінгі күнге дейін Алматыда коронавирусты жұқтырудың 16534 жағдайы расталды. Біздің елімізде олардың жалпы саны — 136983.
Бұған дейін хабарланғандай, Қазақстанда Гамалеи атындағы эпидемиология және микробиология ұлттық зерттеу орталығында әзірленген ресейлік «Спутник V» коронавирусқа қарсы вакцина тіркелетін болады. Тиісті келісімге Денсаулық сақтау министрі Алексей Цой және Ресейдің тікелей инвестициялар қорының басшысы Кирилл Дмитриев қол қойды.
Сурет: detskiyvrach.com.ua
