Ақтөбедегі тергеу изоляторында отырған Данияр Кенжалин бір апта бойы тамақ ішкен жоқ. Ол кісі өлтіру бабы бойынша қозғалған іске қарсы, сондықтан аштық жариялады. Бұл туралы күдіктінің анасы Бақытқұл Боқаева айтты.
28 жастағы ер адам 26 қыркүйекте Ақтөбеде болған төбелестен кейін ұсталды. Бастапқыда оған қатысты денсаулыққа қасақана ауыр зиян келтіру бабы бойынша іс қозғады. Алайда айыптаудан кейін, жәбірленуші ауруханада қайтыс болғандықтан, бұзақылық ниетпен кісі өлтіру бабы бойынша ауырлатылды.
Кенжалиннің анасы ұлының кісі өлтіруге қатысы жоқ екеніне сенімді. Оның пайымдауынша, тергеуде көптеген бұзушылықтар жіберіліп, соның салдарынан нағыз қылмыскер жазадан құтылып отыр.
Кенжалиннің мүддесін қорғайтын адвокат Әбдісамат Рахманов та осындай пікірде. Ол тергеушілерде оның клиентінің қылмыс жасағаны туралы нақты дәлелдер жоқ екенін айтты.
Ақтөбе облысының қадағалау органы Кенжалиннің аштық жариялағанын растады. Прокуратура ер адамға қатысты ашылған іс әлі де тергеу сатысында екенін хабарлады.
