Ақтөбе облысындағы “АМК мұнай” компаниясының Башенколь кен орнында еңбек етіп жүрген қызметкерлер басшылығы жалақыларын көтермейінше жұмысқа шығудан бас тартты, деп хабарлайды diapazon.kz ақпарат ресурсы.
Президент Қасым-Жомарт Тоқаевқа жолдаған үндеуінде ереуілге шыққан жұмысшылар бүгінгі күні олардың жалақы мөлшері 60 мың теңгені құрайтынын мәлімдеді. Мұнайшылардың айтуынша, мұндай ақша отбасын асырау, коммуналдық төлемдерді төлеу және азық-түлік сатып алу үшін жеткіліксіз.
Осыған байланысты мұнай өндіруші компания қызметкерлері еңбекақыны 150 мың теңгеге дейін арттыруды талап етуде. Ереуілшілер жергілікті билік пен Nur Otan партиясына жүгінгендерін атап өтті, бірақ нәтиже болған жоқ.
Сонымен қатар, Ақтөбе облысында “ҚМК мұнай” компаниясы қызметкерлерінің ереуілі жалғасуда. Ол 25 қаңтардан басталды. Олар да жалақыларын көтеруді талап етуде.
Бұл компанияның қызметкерлерінің айтуынша, компания жұмысшылардың жалақысын арттыруға мүмкіндігі бар, әрине, ниет болса.
“Біз жыл сайын мұнай өндіру жоспарын асыра орындаймыз, алайда жұмысшылардың жалақысы басқа мұнай компанияларымен салыстырғанда өте төмен”, – деді мұнайшылар.
Сурет: diapazon.kz
