Ақтөбе полиция департаментінің өкілдері өңірде қанша төтенше жағдай режимін бұзу фактілері анықталғаны туралы мәлімет берді, деп хабарлайды “Қазақпарат” ақпарат арнасы.
Облыстық полиция ведомствосының ақпараты бойынша, төтенше жағдай енгізілген сәттен бастап Ақтөбе облысында тәртіпті бұзудың 41 фактісі анықталған.
Полиция негізінен тәртіп бұзатындар шағын және орта бизнес субъектілері, атап айтқанда, қолданыстағы шектеулерге қарамастан, 22:00-ден кейін жұмыс істеген кафе мен мейрамханалардың иелері екенін айтады.
Осыған байланысты мұндай мекемелердің иелеріне, жалпы сомасы 900 мың теңгеден асатын әкімшілік айыппұл салынды. Сонымен қатар, 5 адам қамауға алынды.
Сондықтан заң өкілдері төтенше жағдай режиміне сәйкес сауда орталықтарына 18:00 – ге дейін, базарларға 17:00 – ге дейін, ал қоғамдық тамақтану субъектілеріне 22:00-ге дейін жұмыс істеуге рұқсат етілгендігін тағы да еске салады.
Төтенше жағдай режимі бұзылған жағдайда қоғамдық тамақтандыру субъектілері 10 айлық есептік көрсеткіш мөлшерінде әкімшілік айыппұл салу немесе 15 тәулікке қамауға алу түрінде жазаға тартылады.
Ақтөбе полиция департаментінің өкілдері азаматтарды төтенше жағдай режимінің белгіленген ережелерін сақтауға шақырады.
