6655 әскери бөлімінде үш жыл бұрын болған лаңкестік әрекет кезінде қайғылы қаза тапқан әскери қызметкерлерді еске алды. Бұл туралы “Қазақпарат” ақпарат агенттігі хабарлайды.
“Өкінішке орай, бейбіт уақытта қылмыскерлердің қолынан полиция қызметкерлері, әскери қызметшілер мен бейбіт тұрғындар қаза тапты. Құқық қорғау органдарының жедел шаралары қылмыскерлердің ойларын жүзеге асыруға мүмкіндік бермеді. Халықтың тыныштығын қорғап, 6655 әскери бөлімінің үш әскери қызметшісі – майор Даниель Майлыбаев, кіші сержант Берікжан Қалиев, қатардағы жауынгер Досбол Сапар қаза тапты. Бұл орны толмас қаза. Олардың ерлігі тәуелсіз Қазақстанның шежіресінде мәңгі қалады. Бұл оқиға біз үшін үлкен сабақ болуы керек. Осындай салдарға әкеп соққан зұлымдыққа қарсы мемлекеттік органдармен бірге қоғам да күресуі керек”, – деді Облыс әкімі Оңдасын Оразалин.
Облыс әкімі бөлім аумағында орнатылған мемориалға гүл шоқтарын қойып, қаза тапқандардың есімдерін Қазақстан халқы ешқашан ұмытылмайтынын мәлімдеді.
Естеріңізге сала кетейік, 2016 жылдың 5 маусымында Ақтөбе қаласында лаңкестік әрекет болды. Ланкестер екі қару-жарақ дүкеніне және 6655 әскери бөліміне шабуыл жасады. Атыс салдарынан үш жас жауынгер қаза тапты.
ҚР Президентінің 2016 жылғы 5 желтоқсандағы № 382 Әскери борышын үлгілі орындағаны,заң мен тәртіпті сақтауда көрсеткен батылдық пен қайсарлығы, ұлттық қауіпсіздікті нығайтуға қосқан үлесі үшін” майор Даниэль Майлыбаев қайтыс болғаннан кейін ІІ дәрежелі “Айбын” орденімен марапатталды. Кіші сержант Берікжан Әлиев пен қатардағы жауынгер Досбол Сапар қайтыс болғаннан кейін III дәрежелі “Айбын” орденімен марапатталды.
Сурет: Inform.kz
