Америка Құрама Штаттарының Мемлекеттік департаменті Қасым-Жомарт Тоқаевты Қазақстан Республикасының Президенті лауазымына кірісуімен құттықтады. Мемлекеттік департамент ресми өкілінің орынбасары Роберт Палладино Америка-қазақстандық қарым-қатынас нығая түсетініне сенім білдірді.
Палладино жаңа мемлекет басшысын құттықтап, екі елдің стратегиялық әріптестігін тереңдету бойынша бірлескен жұмыс жалғасатынына сенім білдірді.
Палладино, Америка Құрама Штаттары екі елдің өзара экономикалық, сауда, инвестициялық, сонымен қатар өңірлік және жаһандық қауіпсіздік саласындағы мүдделері алға басатынына үміттенетінін атап өтті. Екі мемлекеттің қарым-қатынасы өркендеудің, бостандық пен өңірлік қауіпсіздікті құрметтеудің ортақ идеяларына негізделген, деп мәлімдеді Палладино.
Палладино Америка Құрама Штаттары Нұрсұлтан Назарбаевтың Америка мен Қазақстан арасындағы берік және серпінді қатынастарының қалыптасуы мен дамуына қосқан үлесіне жоғары баға беретіндігін айтты.
Палладиноның айтуынша, АҚШ Назарбаевтың ядролық қаруды таратпауға, халықаралық денуклеаризацияға күш салуға, билікті бейбіт жолмен беруге ұмтылуын және оның Қазақстан мен өңірде бейбітшілік пен өркендеуді қамтамасыз етуге қосқан үлесін мойындайды.
2018 жылдың қаңтар айында Елбасы АҚШ президенті Дональд Трамппен кездесті. Қазақстан мен АҚШ сол кезде жиырмадан астам екіжақты экономикалық шарттарға қол қойды.
Назарбаев 2019 жылы 19 наурызда президенттік өкілеттілігін тоқтатты. 20 наурызда оны Сенат басшысы қызметін атқарған Тоқаев ауыстырды.
Сурет: ЕА Daily
