Ақмола облысы полиция департаментінің қызметкерлері өңірдің 142 шенеунігі автожолдарды тиісті дәрежеде ұстамағаны үшін әкімшілік жауапкершілікке тартылғандығын айтты.
Облыстық полиция ведомствосының ақпараты бойынша, жыл сайын өңірде автожолдарға маусымдық тексеріс жүргізіледі. Облыстағы жолдардың жалпы ұзындығы 18924 километрді құрайды, оның 1751 километрі республикалық маңызы бар жолдар болып табылады. Тексеру нәтижесі бойынша 4825 шақырым жолдың кемшілігі бар екені анықталды.
Осыған байланысты жол-көлік оқиғаларын болдырмау үшін Ақмола облысының жол және коммуналдық қызметтеріне анықталған ақауларды жою үшін 1866 ұйғарым жіберілді.
Облыстық полиция департаменті қызметкерлерінің айтуынша, автожолдарды ұстауға жауапты шенеуніктер өз міндеттерін тиісінше орындамағаны үшін әкімшілік жауапкершілікке тартылды.
