Ақмола облысының басшысы Ермек Маржықпаев селекторлық кеңес өткізді, онда өңірдегі инвестициялық жобаларды жүзеге асыру туралы сөз болды, деп хабарлайды zakon.kz жаңалықтар ресурсы.
Облыс әкімі өңірде 332 инвестициялық жобаны жүзеге асыру жоспарланып отырғанын, бұл мақсатқа республика бюджетінен 45 миллиард теңге бөлінгенін айтты.
Ермек Маржықпаевтың айтуынша тұрғын үй-коммуналдық шаруашылық, инженерлік-көліктік инфрақұрылым, әлеуметтік-мәдени сала нысандарын салу және қайта жаңарту, сондай-ақ елді мекендерді абаттандыру бойынша жобаларды жүзеге асыру қарастырылды.
Аймақ басшысы барлық жоспарланған инвестициялық жобалардың 194-і әлеуметтік салаға қатысты екенін, сондықтан оларды іске асыру халықтың бірқатар мәселелерін, соның ішінде жұмыспен қамтуды шешуге мүмкіндік беретінін атап өтті.
Ермек Маржықпаев кеңесті қорытындылай келе, қала және аудан әкімдерінің назарын алдарына қойған міндеттерді жедел шешудің, және бюджеттен бөлінген қаржыны тиімді игерудің маңыздылығына аударды.
Аймақ басшысы республикалық бюджеттен бөлінген қаражат Ақмола облысындағы бірқатар мәселелерді шешуге мүмкіндік беретінін баса атап өтті.
