Көкшетау қаласында аппарат кеңесі өтті,онда жерді пайдалану мен қорғауға байланысты мәселелер талқыланды. Бұл туралы Ақмола облысы әкімдігінің баспасөз қызметі хабарлады.
Облыс әкімі Ермек Маржықпаевтың төрағалығымен өткен кездесу барысында осы жылдың 11 айында облыс жерлерінің пайдаланылуы мен қорғалуын бақылау басқармасы 411 тексеру жүргізілгені туралы ақпарат берілді.
Кеңеске қатысушылардың алдында сөз сөйлеген осы сала басқармасының басшысы Ерғали Шорин облыста тексеру нәтижелері бойынша жер заңнамасы нормаларының 354 бұзушылығы тіркелгендігін айтты.
Сонымен қатар, Ерғали Шорин бүгінгі таңда өңірде ауыл шаруашылығы және коммерциялық мақсаттағы 1683 учаске іске қосылмай тұрғанын атап өтті.
Өз кезегінде Ермек Маржықпаев қала және аудан әкімдері пайдаланылмайтын жерлерді анықтауға бағытталған шаралар қабылдауы қажеттігіне назар аударды.
Сонымен қатар, облыс әкімі салалық басқармаға жер заңнамасына қатысты қабылданған шешімдердің заңдылығын бақылауды тапсырды.
Сурет: inform.kz
