«Игі істер марафоны» ұранымен Қазақстан Тәуелсіздігінің 30 жылдығында бүкіл ел бойынша әлеуметтік және қайырымдылық іс-шаралары басталды. Ақмола жастары да шетте қалмай, игі істер жасауды жалғастыруда, деп хабарлайды «ҚазАқпарат» ХАА өңірдің ішкі саясат басқармасына сілтеме жасай отыра.
Атап айтқанда, наурыз айынан бастап облыстық жастар-ресурстық орталығы еріктілерді қолдау орталығымен бірге Көкшетау қаласындағы «Үміт Шаңырақ» қарттар үйіне барып, ауласын қардан тазартты. Бұл акцияны жергілікті жоғары оқу орындары да қолдады. Студенттер мерекелік көңіл-күй сыйлап, ұлттық тағамдар таратып, тұрғындарды бірқатар игі істерімен де қуантты. Ш.Уәлиханов атындағы Көкшетау мемлекеттік университеті мен А. Мырзахметов атындағы университеттің 150-ден астам студенті аллеяда, сондай-ақ қарттар үйлерінің аулаларында қар тазартты.
«Мен жалғыз тұрамын. Көрсетілген көмек үшін ризамын. Осы іс-шараны ұйымдастырған университет ұжымына үлкен алғысымды білдіргім келеді», — деді зейнеткер Раиса Антонова.
Облыстық ресурстық орталық бұл марафонның мақсаты — адамдар мен ұйымдарды біріктіретін қайырымдылық қозғалысын дамыту, адамдарды жақсылық жасауға ынталандыру екенін атап өтті. Облыстың 100-ден астам ауласы қардан тазартылды.
«Жыл басынан бері Ақмола облысы еріктілерді қолдау орталығының фронт-офисінің басшылығымен «Qamqor» бағыты бойынша 1 720 отбасын қамтыған 83 іс-шара өткізілді. Осы кезеңде еріктілер халықтың әлеуметтік осал топтарын қамтыды, көп балалы және аз қамтылған отбасылар үшін түрлі қайырымдылық акцияларын, қар тазалау бойынша акциялар өткізіп, азық-түлік себеттерін таратты»,-деп толықтырды Жастар ресурстық орталығының маманы Жеңіс Балабеков.
Мамандар облыстық және қалалық жастар ресурсы орталықтары қала тұрғындарына 500-ден астам гүл шоқтарын таратып, Наурыз мерекесімен құттықтау хаттарын табыс етті. «Мейірімді жүрек Lider.kz» қоғамдық бірлестігімен бірге қиын өмірлік жағдайға тап болған адамдарға арналған «Үміт Шахырақ» қарттар үйі мен пансионатта 25 келі бауырсақ пен 15 литр қымыз таратылды.
