Солтүстік Қазақстан облысына 314-ші атқыштар дивизиясының Жауынгерлік Туының көшірмесі жеткізілді. Осы жылдың 15 наурызына дейін ол тарихи-өлкетану мұражайында уақытша тұрады.
314-ші атқыштар дивизиясы Солтүстік Қазақстанда құрылған. Ол өңір аумағында құрылған ең ірі әскери құрам болды.
Дивизия 1941 жылдың шілде-тамыз айларында құрылып, Ленинградты, Выборгты және Шығыс Еуропаның бірқатар елдерін азат етуге белсенді қатысты. Бастапқыда дивизия саны 11 мың адамға жетті, бірақ соғыстан мыңға жуық сарбаз ғана үйлеріне оралды.
Тарихи-өлкетану мұражайында сарбаздардың жеке заттары мен қарулары бар. Жыл сайын мұражай акция өткізіп, оның барысында өз экспонаттарының санын толықтырады. Негізінен оларды соғысқа қатысқандардың туыстары немесе жақын достары әкеледі.
Қорғаныс істері жөніндегі департаментінің өкілі Жігер Қасымов туды табыстаудың басты мақсаты қаза тапқан солдаттарды еске алу және жастарды әскери-патриоттық тәрбиелеу екенін атап өтті.
Әскери ту облыстың барлық аудандарында болады, ал 7 мамырға қарай Қазақстан астанасына жеткізіліп, Ұлы Отан соғысы Жеңісіне арналған шеруге шығарылады.
Сурет: Inform.kz
