12 қараша күні Орталық коммуникациялар қызметінде Атырау облысының әкімі Нұрлан Ноғаевтың қатысуымен баспасөз мәслихаты өтті. Аймақ басшысы «мемлекет Басшысының Жолдауын жүзеге асыру аясында Атырау облысының 2018 жылдың 9 айындағы әлеуметтік-экономикалық даму нәтижелері» тақырыбында сөз сөйледі Tengrinews.kz хабарлайды.
Атап айтқанда, Нұрлан Ноғаев өз сөзінде жаңа жұмыс орындарын ашу мәселелеріне және мемлекеттік бағдарламаларға қатысуға тарту шараларына тоқталды.
«Атырау облысындағы жұмыссыздық деңгейі биылғы жылдың екінші тоқсанында 4,9% — ды құрады. Жалпы, 26 494 жаңа жұмыс орны құрылды, оның ішінде 16 246 – тұрақты және 10 248 — уақытша.
Жұмыспен қамту орталығымен 16 666 адам жұмысқа орналастырылды, қоғамдық жұмыстарға 4 956 адам жіберілді, 411 адам кәсіптік даярлықтан өтті.
Мемлекет басшысының Жолдауын жүзеге асыру аясында, өңірде халықтың әл-ауқатын арттыру бойынша жұмыстар жүргізілуде.
2019 жылдың 1 қаңтарынан бастап 1720 кәсіпорында 10 415 адамның жалақысы 42 мың теңгеге ұлғайтылады. Қазіргі уақытта өңірдің 21 кәсіпорнында қызметкерлердің жалақысын арттыру шаралары жүргізілуде. Бұл кәсіпорындарда 2 587 адам жұмыс істейді», — деді Нұрлан Ноғаев.
Сонымен қатар, «Бизнестің жол картасы-2020» мемлекеттік бағдарламасы аясында 1166 кәсіпкер 81,4 млрд.теңгеге мемлекеттік қаржылық қолдау шараларымен қамтамасыз етілді. Қаржыландыру 5778 жаңа жұмыс орнын ашуға мүмкіндік берді, бұл ретте 15 970 жұмыс орнын сақтап қалды.
