Еңбек және әлеуметтік қорғау министрі Бердібек Сапарбаев аз қамтылған отбасыларына атаулы әлеуметтік көмек алу үшін ұсынылатын құжаттар тізбесін қысқарту туралы айтты, деп хабарлайды Tengrinews.kz тілшісі.
Қазір қажетті құжаттар пакеті 8 бөлімнен тұрады: отбасының әрбір мүшесінің жеке куәлігі, жеке қосалқы шаруашылық туралы мәліметтер, банктегі шот нөмірі, балалардың туу (қайтыс болу) туралы куәлігі, неке қиюды (бұзуды) тіркеу туралы куәлік, жұмыс іздеуші тұлға ретінде тіркеуге өтініш, еңбек қызметін растайтын құжат (бар болса), білімі, біліктілігі, арнайы білімі немесе кәсіби дайындығы туралы құжат (бар болса).
1 шілдеден бастап аз қамтылған азаматтардан әлкуметтік көмек аларда тек жеке куәлік талап етіледі. Қалған құжаттарды жергілікті атқарушы органдар жинайды. Деректер “Е-Халық” электрондық базасына енгізіледі.
Естеріңізге сала кетейік, көп балалы отбасылармен болған қайғылы оқиғалардан және көп балалы аналардың наразылықтарынан кейін, елімізде осы санаттағыларға көмекті арттыру жұмыстары жанданды. Шенеуніктер әлеуметтік көмекке мұқтаж халықтың түрлі проблемаларына назар аудару қажеттілігі туралы пікір айтты. Президент Нұрсұлтан Назарбаев көп балалы аналардың төлемдерін және олар үшін жеңілдікті тұрғын үй құрылысының көлемін ұлғайтуға, сондай-ақ оларға тұрғын үй займдарын 2-3 пайызға беруге тапсырма берді.
Сонымен қатар, сарапшылар кейбір әлеуметтік осал топтарға қолдау жеткіліксіз көрсетілетінін, атап айтқанда, ұзақ уақыт бойы инфляция деңгейіне және бағаның өсуіне, ең төменгі күнкөріс деңгейінің өзгеруіне, сондай-ақ ең төменгі күнкөріс деңгейінің өзгеруіне сәйкес тек қана индекстелетін мүгедектігі бойынша жәрдемақы көтерілмейтіндігін айтты.
Сурет: Хабар24
